مدرسه ده موعللیم
یئنه دؤیدو الیمدن
باشارمادیم فارسینی
ایراد توتدو دیلیمدن
دئدیم: آغا موعللیم
وورما، گؤینه دی الیم
نه دیر آخی گوناهیم؟
توركجه دیر منیم دیلیم
یاپیشدی قولاغیمدان
دئدی: بوراخ توركونو
او قالدی ائوینیزده
اونوت گئتسین كؤكونو
اؤیره نمه سن آب – بابا
آچاجاقسان الینی
كؤتك یئیه ندن سونرا
اونودارسان دیلینی
سنین هاران توركدور؟
آذریسن ، آذری
كیم اؤیره دیب دیر سنه
بئله یانلیش سؤزلری؟
آخدی گؤزومون یاشی
تیتره دی دیل – دوداغیم
بئله یالان سؤزلره
اینانمادی قولاغیم
آنام منی اویدورماز
آتام منی آللاتماز
بو سؤزلرین هئچ بیری
منیم عاغلیما باتماز
نییه منیم آدیمی
سوروشماییر اؤزومدن
نییه سؤزون دوزونو
اوخوماییر گؤزومدن
هركس یالان دانیشسا
آللاهین دوشمانیدیر
من كی یالان دئمیرم
بو اونون یالانیدیر
لایلای دئییبدیر آنام
منه بئشیكده توركجه
دانیشمیشیق هامیمیز
ائوده – ائشیكده توركجه
نه دن گرك یازمایاق
دیلیمیزی كیتابا؟
مدرسه ده نه اوچون
گلمه یك بیز حئسابا؟
هئچ عاغلیما سیغماییر
نه دیر بونون جاوابی
سو یئرینه اوخویام
مدرسه میزده آبی
یقین كؤتك یئمزدیم
اوخوسایدیم دیلیمی
گؤینه رتیدن سیخمازدیم
قولتوغوما الیمی
قوی بؤیویوم بیر اؤزوم
اولاجاغام موعللیم
اوندا چوخ ایش گؤره جك
بو گون گؤینه ین الیم
كیلاسیمدان گله جك
ائلیمیزین اؤز سسی
اولاجاقدیر او زامان
توركون ده مدرسه سی ...
شعر: رسول قربانی مقدم مراغه ای